إمتحن .. إنجح .. و إتعلم

June 2, 2009 في الساعة 1:15 pm |في قسم موضوعات عامة | 11 تعليقات

إمتحانات .. إمتحانات ..إمتحانات …. موسم بقي و الكل واخد أجازه عشان المذاكره .. كل سنه وإنتوا طيبين
ربنا يوفقكم جميعا يارب ..

كل سنه إمتحانات و كل سنه نفس النظام .. نقعد الترم كله نعمل أي حاجه و نيجي في التلات أيام اللي قبل الإمتحان كل حاجه تتظبط و كله يبقي تمام (عارفه أنا النظام ده كويس جدا    :D  )
و بعدين ندخل الإمتحان .. و ننجح و نعدي في الماده (ده غالبا يعني       ) و بعدين ننقل علي الماده اللي بعدها و نعمل نفس الحدوته ..
و هكذا بقي من سنه لسنه …. لحد ما نخلص الكليه و نتخرج .. و إذ فجأة ………

نلاقي نفسنا مش فاهمين أي حاجه   !!!!

بقالنا خمس سنين في كلية هندسه (أو حسب الكليه اللي انت فيها) و خارجين للعالم مش فاهمين أي حاجه ..
و المفروض إننا نشتغل و نكوّن نفسنا
و الأهم إننا نعمل مستقبل لينا و للبلد اللي عايشين فيها (ده المفروض يعني) …

طيب كل ده هايحصل إزاي و إنت خارج من الكليه أبيض يا ورد .. و دماغك أنضف من النظافه (النظافه من الإيمان دي مش حاجه وحشه يعني D: ) ….

في الحاله دي هاتعمل حاجه من إتنين ..
يا إما هاتضحك علي نفسك و تحاول تقنع نفسك و تقنعني إنك ممكن تشتغل بالشكل ده في أي شركه .. و طبعا ده مستحيل ..
و حتي لو المستحيل إتحقق (بإفتراض يعني) .. يبقي سيادتك هاتفضل طوووول عمرك زي ما إنت بالظبط ..
بتشتغل أي شغلانه و السلام المهم .. تقبض اخر الشهر عشان تقدر تتجوز و تفتح بيت ..
و طبعا شغل من غير تعلم و تطوير يبقي شغل من غير طموح و مافيهوش أي تقدم …
يبقي شغل عشان الفلوس بس

أما الحل التاني ..
الكورسات … إنك تقوللي طب و ماله هاخد كورسات بعد ما أتخرج و أظبط الدنيا بالكام كورس التمام و هالاقي ألف من يتمناني D:

هاقوللك إن الحل ده أفضل نوعا (بسيط) من الحل الأول … لكن تأثيره ضعيييييف و بطئ جدا ، لسبب …
إن مش معني إنك أخدت الكورس النهارده .. إنك ممكن تشتغل بيه بكره ..
أضحك عليك لو قلتلك إن الكلام ده سليم ..

الكورس (أيا كان محتواه و أيا كانت جودته) هو في الاخر بيعطيك معرفه أكاديمية نظريه .. فقط
و المعرفه دي يلزمها تطبيق و تطوير و شغل تعمله بإيديك عشان المعرفه دي تتحول من مجرد معرفه إلي علم (يعني نقدر نقول إنك إتعلمت كذا و تقدر تشتغل فيه) ..
و طبعا المده اللي إنت محتاجها لكل كورس تاخده بتختلف طولا و قصرا حسب الكورس نفسه و حسب محتواه .. و أعلاها طبعا كورسات لغات البرمجه و نظم التشغيل
تمام ؟؟

طيب تخيل معايا بقي إن حضرتك عايز تعمل كل ده بعد التخرج ؟؟ .. ده الحل التاني اللي حضرتك بتقترحه عليا …و في نفس الوقت عايز تشتغل شغلانه كويسه في مكان كويس ..

يبقي إحنا محتاجين وقت أد إيه من بعد التخرج لحد ما نبقي قادرين إننا نشتغل ؟؟
طيب محتاجين وقت أد إيه لحد ما نبقي قادرين إننا نشتغل في المكان اللي بنفكر فيه و بنحلك بيه ؟؟؟

أكيد الكلام اللي أنا قلته فوق ده ممكن يعجبك و يناسبك أوي لو إنت طموحك في حدود إنك تشتغل شغلانه بمرتب معقول و السلام ..

لكن أكيد لو إنت بتفكر في شغلانه متميزه و عندك طموح إنك تعمل حاجه و تحقق حاجه في يوم من الأيام و تعمل فرق في الدنيا دي ….
يبقي الكلام اللي الجاي ده يناسبك إنت

..

الحقيقه بقي إن الحلول اللي إحنا إتكلمنا عليها فوق دي لاتصلح ليك خاااالص … ما تأكلش عيش يعني D:

لو إنت بجد عايز تعمل حاجه و عندك طموح كبير عايز تحققه يبقي طريقك و سلاحك الأساسي هو …

العلـــــــــــــــــــــــــــــــــــــــــــــــــــــــــــــــــم

العلم العلم العلم …. و هافضل أكررها ميت مره

اللي ممكن يوصلك للي بتحلم بيه .. هو إنك تتعلم
تتعلم صح و تتعلم بجد و تجيد اللي إنت بتعمله فعلا ..

هاتقوللي .. طيب أتعلم إيه ؟؟ ما أنا بذاكر أهه و بنجح كل سنه بتقدير كمان ؟؟

هاقوللك .. كل ده جميل طبعا .. و جميل جدا كمان و لا غني عنه مليون في الميه

لكن مش لوحده

لازم يكون جمبيه حاجه تتعلمها بجد ..

تعالوا نكون واقعيين

الكليه (في اي حته في العالم مش في مصر بس ) مش ممكن تديك و تعلمك كل اللي انت محتاجه عشان تشتغل صح …
ده الطبيعي في اي مكان في العالم
فما بالك بالتعليم الجامعي في مصر ؟؟؟؟
أكيد الأجابه واضحه …

طيب تعمل إيه ؟؟

لو إنت طالب في قسم حاسبات و نظم أو عندك طموح إنك تشتغل في المجال ده بعد التخرج بإذن الله يبقي لازم تعرف إن الدنيا واسعه جدا جدا في المجال ده ..
و لازم تحدد و تختار إنت عايز تشتغل في ايه بالظبط منه ..

طيب و تحدد و تختار إمتي ؟؟؟

أحسن و أفضل إجابه هي في الكليه طبعا ..

إسأل و إعرف و إتعلم ..
لازم يكون ليك حاجه بتتعلمها دلوقتي و بتجربها و بتجرب نفسك فيها
و إتعلم غيرها و غيرها

و لازم تشغل إيدك و تشغل مخك و تجرب تعمل حاجه باللي إنت إتعلمته …

و مع الوقت . هاتلاقي نفسك بدأت تستقر علي حاجه و علي إتجاه معين هاتلاقي نفسك فيه أكتر من غيره ..

و لما تستقر ..
تبدأ تاخد خطواتك في الطريق اللي إنت إخترته ..
و بالتالي لما نيجي للمرحله اللي عايزين فيها نشتغل نبقي عارفين إحنا عايزين إيه .. أو علي الأقل عارفين إحنا هانمشي في أنهي إتجاه بالظبط …

خلاصة الموضوع ..

إن المستقبل اللي إنت بتحلم بيه .. يبتدي من دلوقتي

و الإعداد للحياه العمليه و الشغل يبدأ من دلوقتي من النهارده

يارب يكون الموضوع أفدكم و لو بحاجه بسيطه .. و يكون بدايه لخطوات جديده في طريق حياتنا العمليه

و أنا أتمني إننا نعمل الموضوع ده دايما مناقشه مفتوحه لكل شئ يخص شغلنا و حياتنا العمليه و نحب نشارك بيه الناس ..

السلام عليكم

م/هند عوض